509. როგორ ვლინდება ჩვენი სულმოკლეობა მწუხარებათა ჟამს?
თავად ჩვენი საქმენი გვამხელენ ჩვენ, როცა მწუხარებათ ჟამს ყველაფერს ვებღაუჭებით, მაგრამ არა ღმერთს. ავად გყავს ბავშვი? მკითხავს ან იმას ეძებ, ვინც უცოდველ ყრმას კისერზე უაზრო ნაწერს ჩამოჰკიდებს. ბოლოს და ბოლოს კი ექიმთან გარბიხარ წამლისათვის და უგულებელყოფ იმას, ვისაც შენი გადარჩენა შეუძლია. სიზმარი შეგაშფოთებს? სიზმრის ამხსნელთან მიეშურები. მტერმა შეგაშინა? მფარველს კაცთა შორის ეძებ. და საერთოდ, ყველა გასაჭირში საკუთარ თვს ამხელ იმაში, რომ სიტყვით ღმერთს უწოდებ შესავედრებელს, საქმით კი შემწეობას უსარგებლოსა და ამოსაგან ეძიებ. მართლისათვის კი ჭეშმარიტი შემწე ღმერთია. მსგავსად მხედართმთავრისა, რომელსაც მამაცი მეომრები ჰყავს და ყოველთვის მზადაა ღონემიხდილებს დაეხმაროს, ასევე, შემწე ჩვენი და მოკავშირე ყველასი, ვინც კი ეშმაკის ვერაგობას ებრძვის, ღმერთია, უგზავნის რა მსახურ სულებს მას, ვინც ხსნას ითხოვს.
როდის არის სულის ზეიმი, ნუგეში მწუხარებაში, სინდისის დამშვიდება, ზეაღტაცებული სიხარული?
სულის ზეიმია ვნებაზე გამარჯვებისა და თავშეკავების დროს; მწუხარებაში ნუგეშია გულითადი ლოცვის შემდეგ; ზეაღტაცებული სიხარულია ბრწყინვალე აღდგომისა. ეს სულიერი გამოცდილებებია.
წმიდაო მამაო, რატომაა, რომ როდესაც მწუხარება მიპყრობს, გმობის აზრები გამოჩნდებიან ხოლმე?
შეხედე, რა ხდება: როდესაც დამწუხრებულს გხედავს, ეშმაკი ამით სარგებლობს და შემოგაპარებს ერულ კარამელს - გმობის აზრებს. თუ პირველსავე შემთხვევაში დაეცემი (ანუ ამ ზრახვა-კარამელს მიიღებ), მეორედ უფრო ძლიერად აგაღელვებს და ძალა აღარ გექნება, რომ მას წინ აღუდგე. ამიტომ არასოდეს იყო მწუხარე, კარგს იზამ, თუ ამის სანაცვლოდ რაიმე სულიერს გააკეთებ. სულიერი საქმიანობა ამ მდგომარეობიდან გამოსვლაში დაგეხმარება.
როგორ ვუყუროთ იმ ადამიანებს, რომელთაც სურთ აიცილონ მწუხარებანი, სურვილის საწინააღმდეგოდ რომ ეძლევათ?
მძიმეა მათი ხვედრი. ვინც მწუხარებას თავს არიდებს, ის საკუთარი ცხონების წინააღმდეგ მოქმედებს, არღვევს იმ წესსა და საშუალებას, რომელიც მას ღმერთმა საცხოვნებლად დაუწესა.
86. ყოველგვარი მწუხარება და ნაკლულევანება ადამიანმა სიმშვდითა და მოთმინებით უნდა გადაიტანოს თუ არა?
მამანო და დედანო, მთავარნო და ქვეშევრდომნო, მოხუცნო, ჭაბუკნო და ქალწულნო, ყოველგვარი ასაკის კაცნო! გადაიტანეთ ყოველი ნაკლულევანება, რომელიც ქონებასა და სხეულს შეეხება. მხოლოდ ერთს ნუ მოითმენთ, იმას, რომ ნაკლულევანება განიცადოს სწავლებამ ღმერთზე
775. შეიძლება თუ არა ამქვეყნად ისეთი ადგილის პოვნა, სადაც თავისუფალნი ვიქნებოდით ყოველგვარი მწუხარებისაგან?
არასოდეს ყოფილა, არ არის და არც იქნება ისეთი ადგილი დედამიწაზე, სადაც არანაირი მწუხარება არ ექნებოდა ადამიანს. ასეთი ადგილის პოვნა შეიძლება მხოლოდ გულში, როდესაც უფალი ჰგიებს მასში.