ავტორი:
წმ. ეპისკოპოსი გაბრიელი(ქიქოძე)
თემა: დიდი მარხვა
დრო არს, ძმაო, გაიღვიძო ძილისაგან შენისა; ისარგებლე საღმრთოითა ამით ჟამითა (დიდმარხვა), თუ ახლაც უდებ იქმენ, თუ ახლაც უსარგებლოთ დარჩა შენთვის ესოდენი შეგონება, სწავლა, ქადაგება, რაღა მოგაქცევს შენ და ვინღა შეგაგონებს, ვერაოდეს ვერსად ვერ გაიგონებ შენ ესრეთ ტკბილსა და ლმობიერსა სიტყვათა, როგორითაც გეტყვის შენ წმიდა ანდრია კრიტელი (იგულისხმება დიდმარხვის დროს საკითხავი წმ. ანდრია კრიტელის კანონი). არ შეიძლება უჯობესად შეგონება კაცისა! სწორედ სულმან წმიდამან გაანათლა ანდრია საღმრთო, თორემ კაცის ენა ვერ წარმოსთქვამდა ესოდენსა მადლსა. რაოდენსა საღმრთოსა სახესა წინა დაგიდებს იგი! რაოდენსა მაგალითსა მოგიყვანს! რაოდნსა საკვირველსა ჰაზრსა შეგაგონებს! ქვეყნის დასაბამიდან ვიდრე უკანასკნელ დღეთადმე რაიცა რამ იყო წმიდა მაგალითი, ყოველსა აღწერს იგი შენთვის! ამის მეტი სხვა არაფერი განსხვავება რომ არ იყოს დიდმარხვის ლოცვებში, მარტო ეს იქმნებოდა საკმაო შენდა განღვიძებად ძილისაგან ცოდვათასა.
|
|
|
