სწავლა ლდ. წმიდათა წერილთა კითხვისათვის.

თემა: სახარების კითხვა

საყვარელნო, უკეთუ გულს-მოდგინედ გამოვეძიებდეთ წმიდათა წერილთა გამოწვლილვით და არა ლიტონად, შევუძლოთ პოვნად ცხოვრება სულთა ჩვენთა. უკეთუ მარადის ვისმენდეთ სიტყვათა წერილისათა, ესრეთ მოვიგოთ სიმტკიცეცა მართლისა სარწმუნოებისა და ცხოვრება კეთილი. ვისმენდეთ უკვე სიტყვათა წერილისათა. ჰოი საყვარელნო, დაღაცათუ სხვისა წიგნისა მიერ განვნათლდეთ, არამედ უფროსღა წმიდასა სახარებასა? ვისმენდეთ და ზედას-ზედა ვიკითხვიდეთ მას, რამეთუ მეყვსეულად განრააღოთ წიგნი, იხილოთ მას შინა სახელი ქრისტესი დაწერილი. და გესმას მეყვსეულად, იტყოდეს რა, ვითარმედ "იესოს ქრისტეს შობა ესრეთ იყო", და კვლავ იხილო და აღმოიკითხო, იტყოდის რა იგი ვითარმედ, :ისწავეთ ჩემგან, რამეთუ მშვიდ ვარ და მდაბალ გულითა", არა სურვიელ იქმნაა ტკბილისა მის უღლისა? კვალად ისმინო, ვითარმედ: "უკეთუ გიყვარ მე მცნებანი ჩემნი დაიმარხენ და რომელსა უყვარდე მე, საყვარელ იყოს მამისა ჩემისა მიერ და მეცა შევიყვარო იგი და მოვიდეთ მე და მამა ჩემი და მის თანა სავანე ვჰყოთ". არა გსუროდის ამათ სიტყვათა ტკბილისა მის მეუფისათა? და მერმეცა იხილო და აღმოიკითხო, ვითარმედ შენთვის შეიკრა და ჯვარსა მოეკიდა და სიკვდილისა გემო იხილა. არა შეიკდიმოა და ლმობიერ იქმნა შენანებად ცოდვათა შენთა? აჰა ესერა ესოდენნი კეთილნი და სარგებელნი აღმოეცენებიან წმიდათა წერილთა წერილთა კითხვისა და სმენისაგან. ამისთვის უკვე გევედრები, საყვარელნო ძმანო, რათა მოვიგებდეთ წიგნთა და მათთანა გულის-ხმის-ყოფასაცა, და რათა გულის-ხმა-ვჰყოფდეთ სიტყვათა მათ და დავსწერდეთ მათ გონებათა შინა ჩვენთა დამტკიცებად სიტყვათა მათ, რათა ესრეთ შევუძლოთ ცხოვრებისა ამის ჩვენისა წმიდა ყოფაი და ღირს ვიქმნნეთ საუკუნეთა მათ კეთილთა, რომელნი მოცემულ არიან ჩვენდა მადლითა უფლისა ჩვენისა იესო ქრისტესითა, რომლისათანა მამასა ჰშვენის დიდება სულით წმიდითურთ, აწ, და მარადის, და უკუნითი უკუნისამდე, ამი