ხარებას ტრანცენდენტური ღმერთი, სამყაროს მიღმიერი ღმერთი, სამყაროს შემოქმედი ქალწულის წიაღში

ხარებას ტრანცენდენტური ღმერთი, სამყაროს მიღმიერი ღმერთი, სამყაროს შემოქმედი ქალწულის წიაღში დამკვიდრდა და ადამიანური ბუნება მიიღო. ეს არის უდიდესი საიდუმლო - ღმერთმა სამყაროში შემოაბიჯა. რა თქმა უნდა, ეს მოსალოცია. ეს საიდუმლო ფარულად აღსრულდა. იგი თვით სატანისთვისაც დაფარული იყო. ანგელოზებიც კი ვერ ხვდებოდნენ. ეს უდიდესი საიდუმლოა - ღმერთის განკაცება და ადამიანად მოსვლა. იგი მხოლოდ სიმდაბლით შეიმეცნება და არა ინტელექტით. ინტელექტუალური ადამიანები მას ვერ იმეცნებენ, მათთვის საიდუმლოდ რჩება. იგი იმდენად დიდი საიდუმლო იყო, რომ სატანა ზრდასრული მაცხოვრის უდაბნოში ცდუნებას ცდილობს. ვის აცდუნებ, შე საწყალო, ვინ უნდა აცდუნო შენ - სამყაროს შემოქმედი? რაკი ადამიანური ხორცი ჰქონდა, სატანას იმედი მიეცა, ეგება ვაცდუნოო, ფარისევლებსაც ეგონათ, რომ მოკლავდნენ. მერედა ვის - სიცოცხლის მომნიჭებელს? უკვდავი როგორ მოკვდება?
    დიახ, დღევანდელ დღეს ღმერთმა შემოაბიჯა ფეხი სამყაროში. მაგრამ ეს დღესასწაული ჩვენ გვახსენებს განსაკუთრებული მსახურების უდიდეს მაგალითს. უდიდესი იყო ყოვლადწმიდა ღმრთისმშობლის როლი, იქნებ - გადამწყვეტიც. უფალს ყოველთვის სურდა ჩვენი ცხონება. შეიძლება უფალს ჩვენი ცხონება არ უნდოდეს? მაგრამ საუკუნეები, ათასწლეულები ელოდებოდა, რომ გამოჩენილიყო ის, რომელიც ეტყოდა: "აჰა, მხევალი უფლისა" - რას ნიშნავს ეს სიტყვები? ზოგს ჰგონია, ღვთისმშობელმა თქვა და გაიხარა, რა კარგია, ღმერთის დედა გავხდებიო. სინამდვილეში მან ამ სიტყვებით, ამქვეყნიური თვალსაზრისით, პირად ცხოვრებაზე სრულად თქვა უარი.