ცოდვა - ციტატები, გამონათქვამები

ცოდვა უნდა გძულდეს, ცოდვილი კი უნდა გიყვარდეს

ვინც მოყვასის ცოდვებს აზვიადებს, ის თვითონ ძალზე პატარაა ღვთის თვალში

სხვებში სათნოებები დავინახოთ, საკუთარ თავში კი ცოდვები

თავი ავარიდოთ ავისმეტყველებას, ამ უდიდეს და სამწუხაროდ, ძალზედ გავრცელებულ ცოდვას; მომაბეზრებელი ბუზებივით ნუ მივეტანებით სხვის ჭრილობებს; უმჯობესია, მივბაძოთ გონიერ ფუტკარს, რომელიც ყოველთვის ყვავილებზე ჯდება.

ცოდვილ მეგობარს მსაჯულის შესახებ შეახსენე. ამით მასაც სარგებელს მოუტან და საკუთარ თავსაც; რამეთუ ეს რჩევითი მკურნალობა სასარგებლოა როგორც მისთვის, ისე - შენთვის.

გონს მოიყვანე ცოდვილი, მაგრამ ნუ განიკითხავ დაცემულს; რამეთუ ეს უკანასკნელი ავი საქმეა, პირველი კი - გამოსწორების სურვილი.

ცოდვილთა განკითხვისგან თავს შეიკავებ, თუ ყოველთვის გემახსოვრება, რომ იუდა ქრისტეს მოწაფეთა კრებულში იყო, ავაზაკი კი - მკვლელთა; მაგრამ ერთ წამში მათში სასწაულებრივი გარდასახვა მოხდა.

ნუ განიკითხავ ცოდვილს, რაც არ უნდა დიდი იყოს მისი ცოდვები, რადგან, თუ ის იგრძნობს თავის დანაშაულებათა სიმძიმეს და ღვთისკენ მობრუნდება, შესაძლოა, უფალი უფრო მეტად შეიყვაროს, ვიდრე მან, ვისაც მძიმე ცოდვები არა აქვს.

ნურავის განიკითხავთ დროზე ადრე; ისინი, ვინც ცათა სასუფევლისგან ყველაზე შორს გვგონია და რომლებიც ჩვენ, შესაძლოა, გვძაგს ამის გამო, იქნებ წმიდანები გახდნენ და ოდესმე ამის გამო ჩვენ განგვიკითხონ.

სასოწარკვეთას არ უნდა მივეცეთ ბოროტმოქმედთა გამო, არამედ - გულმოდგინედ უნდა ვილოცოთ მათთვის, რომ კეთილნი გახდნენ. წმიდანთა რიცხვი ყოველთვის ცოდვილთაგან ივსება.