ღმერთი და ადამიანები - ციტატები, ამონარიდები
განერიდეთ ასტროლოგიას. იგი თავისი არსით ბრმა ფატალიზმია. ქრისტიანული სწავლების მიხედვით ადამიანი ვარსკვლავებზე მაღლა დგას.
ჩვენი გრძნობების სიმრავლე, ჩვენი აზრების სიმრავლეს ბევრად აღემატება. ჩვენ უფრო მეტად ვგრძნობთ, ვიდრე ვაზროვნებთ.
ცოდნას, რომელიც აღმოსავლეთში აღმოცენდა, ადამიანი ღმერთთან მიჰყავს, მაშინ როცა დასავლეთში არც თუ ისე იშვიათად ცოდნა მას ღვთისგან განაშორებდა.
სულიერი სიგლახაკე და გულის შემუსვრილება უგონიერესთა თვისებაა, ეს არის ღვთაებრივი სიდიადის წინაშე საკუთარი არარაობის გაცნობიერება.
თუ ადამიანს ჰგონია, რომ ყველაფერი იცის, იგი იმაზე დაბლა დგას, ვინც არაფერი იცის.
სულით გლახაკია ის განსწავლული, რომელიც ნიუტონის მსგავსად აღიარებს, რომ მისი უცოდინრობა ცოდნას უსასრულოდ აღემატება.
ნუ გასცემ პასუხს ადამიანს კითხვაზე, ეს ქვეყანა უსასრულოა თუ არა. თუ ქვეყანას ბორცვიდან გადმოხედავ, მართლაც აქვს დასასრული, სხვა სიმაღლიდან კი ბოლო არ უჩანს.
ახლომხედველი მიიჩნევს, რომ სამყაროს საზღვრები მის თვალსაწიერს არ სცილდება. თვით მზე, რომლის სხივი ყველაზე მახვილ მზერასაც კი უკან მოიტოვებს, გონება რომ ჰქონდეს ასეთი განსჯისაგან თავს შეიკავებდა.
სამყაროს სიდიადეს ადამიანი მხოლოდ მაშინ გააცნობიერებს, როცა ირწმუნებს, რომ ეს ქვეყანა სრულყოფილი სულის მიერაა შექმნილი.
ამ უსასრულო სამყაროში ადამიანი მინიატურაა, მაგრამ ის საკმაოდ ძლევამოსილია, რომ თავისი ქმედებებით ეს სამყარო შეცვალოს და გარდაქმნას.