საყვარელნო, ვიქმოდეთ მოწყალებასა გლახაკთა ზედა, რათა არა დავშრეტდეთ ლამპართა ჩვენთა. არამედ დავიცვნეთ იგინი ბრწყინვალედ მოწყალებისა მიერ, რამეთუ მოწყალებისა ნათელი უშრეტელ არს და განმწმედელ სულისა უფროს ოქროსა ბრწყინვალისასა. რამეთუ იტყვის, "მიეცით მოწყალება და აჰა თქვენი ყოველი წმიდა არს". განვაბნიოთ საფასე და შევიკრიბოთ ჭურჭელთა ჩვენთა ზეთი წყალობისა ვიდრეღა აქა ვართ. რამეთუ მუნ არღარა არს სავაჭროი, არცა ვინ მიიღოს სხვისა მისგან, გარნა ხელისაგან გლახაკთასა შევიკრიბოთ უკვე აქავე მდიდრად, უკეთუ გვენებოს სიძისა მის თანა შესვლა და არა გარე დაშთომაი. რამეთუ დაღაცათუ ბევრეული სათნოება წარვმართოთ თვინიერ მოწყალებისა, ვერ შევიდეთ სასუფეველსა. ამისთვის გევედრები, საყვარელნო, მოსწრაფედ მოვიგოთ მოწყალება, რომელი მსგავს ღვთისა ჰყოფს მომგებელთა მისთა, რამეთუ იტყვის: "იყვენით მოწყალე, ვითარცა მამა თქვენი ზეცათა მოწყალე არს", და მოწყალენი შეიწყალებიან ღვთისა მიერ, რომლისა არს დიდება უკუნითი უკუნისამდე, ამინ

link

გლოცავ და გევედრები, საყვარელნო ძმანო, რათა მოსწრაფე ვიყვნეთ სათნოებათა მოგებად, სათნო ყოფად სახიერისა მის ღვთისა, რომელნი იგი სარგებელ ჩვენდა იყვნენ, ესე იგი არს, რათა სულთა ჩვენთათვის კეთილად ვზრუნვიდეთ. რამეთუ ესეცა მისის კაცთ-მოყვარებისაგან არს. რომელ არა რაი ეხმარების მას ჩვენგან და ჩვენსა ოდენ კეთილსა და სათნოებასა ეძიებს, - და იგი შეურაცხიეს ვითარცა მისაგებელად მისთა კეთილთა, რაჟამს ჩვენ სულთა ჩვენთათვის კეთილად ვზრუნვიდეთ.
ამისთვისა უკვე ფრიადისა უგულისხმოებისა სახე არს, რათა ვინათგან მეუფესა ჩვენსა ესრეთ ნებავს ჩვენი ცხოვრება და ჩვენ არა ვჰქმნათ ძალისაებრ ჩვენისა კეთილი და სათნო ვეყვნეთ, რათამცა მივემთხვივნეთ ურიცხვთა მათ კეთილთა. ამის ყოვლისათვის უკვე შევსწიროთ მადლი კაცთ-მოყვარესა ღმერთსა - ნუ სიტყვით ოდენ, არამედ უფროსად საქმეთა მიერ კეთილთა, რათა საუკუნენი კეთილნი მოგვეცნენ, რომელთა ღირსმცა ვართ ყოველნი მიმთხვევად მადლითა და კაცთმოყვარებითა უფლისა ჩვენისა იესო ქრისტესითა, რომლისა თანა მამასა ჰშვენის დიდება სულით წმიდითურთ, აწ, და მარადის, და უკუნითი უკუნისამდე, ამინ

link

საყვარელნო, ძმანო ჩემნო!ვიქმნნეთ ჩვენცა წმიდა, ვისწრაფოთ ქმნაი კეთილისა. ხოლო რაი არს კეთილი? სჯაი ობლისა და განმართლება ქვრივისა. რამეთუ დიდ არს წერილთა შინა სიტყვა ესე ობოლთა და ქვრივთა, არამედ ჩვენ არა დიდად გვაქვს იგი (მიჩნეული), რამეთუ იხილეთ, ვითარი არს მადლი მისი, რამეთუ იტყვის, ვითარმედ: "უკეთუ იყვნენ ცოდვანი თქვენნი, ვითარცა მეწამულნი, ვითარცა თოვლი განვასპეტაკო, და უკეთუ იყვნენ, ვითარცა ღებილნი, ვითარცა მატყლი განვასპეტაკო". ამისთვის უკვე ვისწრაფოთ ხელის-აღპყრობად ობოლთა და ქვრივთა, რამეთუ არა მცირე ძალი აქვს ცრემლთა ქვრივისა, ობლისა და გლახაკისა. არამედ შემძლებელ არიან საცა განხმად და ჯოჯოხეთისა ცეცხლთა დაშრეტად. ამისთვის უკვე ნუმცა ბოროტსა ვუყოფთ მათ და ნუმცა უსავმართლოებთ. და ესე არს სამართალ, რათა ფრიადი ვფპოვოთ ჩვენცა წყალობაი ამასცა საწუთოსა და მერმესაცა საუკუნოსა. რამეთუ მრავალთა ცოდვათა ვჰპოვოთ ამის საქმისა მიერ შენდობაი, და კადნიერებით წარმოუდგეთ საყდარსა ქრისტესსა, და ღირს ვიქმნნეთ ყოველთა მართალთა თანა სასუფეველსა ცათასა მადლითა და კაცთ-მოყვარებითა უფლისა ჩვენისა იესო ქრისტესითა, რომლისა არს დიდება და სიმტკიცე თანა მამით და სულით წმიდითურთ, აწ, და მარადის, და უკუნითი უკუნისამდე, ამი

link