ბიბლია - ციტატები, გამონათქვამები
ბიბლია - ციტატები, გამონათქვამები ბიბლია, გამონათქვამები, ციტატები, ამონარიდები
ძმანო ქრისტიანენო, სიტყვა ღვთისა გვყოფს ნეტარად, უკეთუ ვისმენთ და აღვასრულებთ მას. სიტყვა ღვთსა, ანუ საღმრთო წერილი პირველად განანათლებს გონებასა და გულსა კაცისაას და მეორედ გამართავს და შეამკობს მისსა მოქმედებასა
თემა: ბიბლიაავტორი: წმ. ეპისკოპოსი გაბრიელი (ქიქოძე)
წყარო: ქადაგებანი გაბრიელ ეპისკოპოსისა - I ტომი
112. გარეგანი და გრძნობადი სხეულებრივი ღვწის ხატი ძველი აღთქმაა, ხოლო წმინდა სახარება, რაც არის ახალი აღთქმისა, გულისმიერი ყურადღების ანუ განწმენდილობის ხატია, და ისევე როგორც ძველი აღთქმა ვერ სრულყოფდა, ვერცთუ გულსავსეს ხდიდა შინაგან ადამიანს ღვთისმსახურებაში, რადგან, მოციქულის თქმით, „რჯულმა ვერარა სრულყო“ (ებრ. 7.19), შეაფერხა რა მარტოოდენ უხეში ცოდვები, ვინაიდან მოყვასის თვალისა და კბილთა ამოგდების აკრძალვაზე (იგულისხმება: „თვალი თვალისა წილ და კბილი კბილისა წილ“ გამოსვლ. 21.26–27) უმჯობესი, სულის სიწმინდისათვის, ესაა გულიდან ზრახვებისა და უკეთური ფიქრების მოკვეთა, რაც მცნებაა სახარებისა. იგივე ითქმის სხეულებრივი სამართლიანობისა და ასკეზისის შესახებ (ვგულისხმობ მარხვას, თავშეზღუდვას, მიწაზე წოლას, ზედგომას, მღვიძარებას და სხვა მაგვარს, რაც კი სხეულს უკავშირდება და რაც აცხრობს სხეულის ვნებად ნაწილს მოქმედებითი ცოდვისგან). კარგია ესენიც, ისევე როგორც ძველ აღთქმაზე ვთქვი ზემოთ, რადგან ამათ მიერ ხდება ჩვენი გარეგანი ადამიანის აღზრდა და მისი დაცვა მოქმედებითი ვნებებისგან, თუმცა კი არა აქვთ მათ დამცველობა აზრისმიერი ცოდვებისგან და ამ ცოდვათა ამკრძალველობა, – რომ განგვარიდონ ჩვენ, ღვთის შეწევნით, მკვლელობისგან, მრისხანებისგან და სხვა ამგვართაგან.
შეეცადე, რომ სახარება შეითვისოს შენმა გულმა და გონებამ, ისე, რომ გული და გონება შენი განიფინოს მასში, მაშინ შენი მოქმედებაც უფრო სახარების მიხედვით აეწყობა და ქვეყნიური ცხოვრებაც უფრო დაწყნარებული გექნება.
არასოდეს შეეცადო, ძმაო, სახარების, ან სხვა წიგნების შენით ახსნა-განმარტებას. გახსოვდეს, რომ წმიდა წერილი წმიდა წინასწარმეტყველებისა და მოციქულთა მიერ არა თავიანთი ნებით, არამედ სულიწმიდის ჩაგონებითა და კარნახით (2 პენრ. 1.21) განა არ იქნება დიდი უაზრობა და დიდი უგუნურება ჩვენით მისი ახსნა-განმარტება? სულიწმიდით განმბრძნობილი ადამიანების მიერ ჩაწერილი წმიდა წერილის ახსნა-განმარტება მოხდა ისევ სულიწმიდით წმიდა მამათა მიერ. გახსოვდეს, რომ ღვთის სიტყვაცა და მისი განმარტებაც უდიდესი მადლია სულიწმიდისა. მხოლოდ წმიდა მამათა ახსნილსა და განმარტებულ სიტყვას იწონებს და იღებს წმიდა მართლმადიდებელი ეკლესია და მისი ჭეშმარიტი წევრი. ვინც ცდილობს თვითნებურად ახსნას სახარება და წმიდა წერილი, ის ამით უარყოფს სულიწმიდის მიერ წმიდა მამათა პირით განმარტებულს, რითაც უარყოფს თვით საღვთო წერილს. ამიტომ, საყვარელნო, უნდა გამოვიჩინოთ დიდი სიფრთხილე წმიდა წერილის კითხვისას. ყოველი სიტყვა, ყოველი დარიგება ისე უნდა იქნეს გაგებული, როგორც გვიხსნიან წმიდა მამანი. მაგრამ თუ მაინც გაუგებარია იგი, როგორ უნდა მოიქცეს ჭეშმარიტების მაძიებელი? საჭიროა მან მოიძულოს ცოდვილი ცხოვრება, ქვეყნიური გატაცებანი და მაშინ, როცა განიწმიდება კაცი, უფრო მეტად გაცხადდება მისთვის ჭეშმარიტება სახარებისეული.
უძლეველმა ღმერთმა გაუმხილა თავისი ნება უსუსურ არსებას - ადამიანს. წიგნი, რომელშიცაა მიცემული ეს უდიდესი და უწმიდესი ნება ღვთისა, შენს ხელთაა. შენ, ძმაო, შეგიძლია მიიღო და შეგიძლია უარყო ნება შენი შემოქმედისა და მხსნელისა. არჩევანი თვითონ უნდა გააკეთო, შენი მომავალი საუკუნო ცხოვრებაცა და საუკუნო სატანჯველიც შენს ხელთაა. აქედან განსაჯე, როგორი სიფრთხილე და გონიერება გმართებს ამ წიგნთან.
უეჭველია, ძლიერ გონივრად იქცევა ისა, ვინც მუდამ ჟამს კითხულობს საღმრთო წერილს. იმის წამკითხავი ორნაირად არის სარგებლობაში, პირველად: შეისწავებს ღვთის ვედრებასა და რამდენსაც მომატებულად კითხულობს, იმდენად მკვიდრად დაინერგება იმის გულში სარწმუნოება ქრისტესი; და მეორედ; იქ შეხვდება მრავალ ნამდვილ ქართულ სიტყვასა, რომელნიც ამჟამად ბევრნი მათგანნი აღარ იხმარებიან საერთო ლაპარაკში, და მაშინ, როდესაც საღმრთო წერილი გადმოუთარგმნიათ ქართულად ბერძნულიდგან, ხმარებაში ყოფილა. მხოლოდ იქიდგან გამოტანილი სიტყვა უნდა მოიხმაროს ისე, იმ კილოზე, როგორც ამჟამად ლაპარაკობს ხალხი.
როდესაც წასაკითხად გადაშლი სახარებას, გაიხსენე, რომ მან უნდა გადაწყვიტოს შენი მომავალი, სწორედ ამ წიგნით უნდა გასამართლდე და იმის მიხედვით, თუ როგორ აღასრულებდი ქვეყნიური ცხოვრებისას მის მცნებებს, მიიღებ შენს კუთვნილს - ან საუკუნო სიხარულს, ანდა საუკუნო მწუხარებას.
ნუ კმაყოფილდები მხოლოდ უნაყოფო კითხვით წმიდა წერილისა; ეცადე შეასრულო მასში მოცემული მცნებანი, იკითხე იგი საქმიანად. გახსოვდეს, ძმაო, რომ სახარება ცხოვრების წიგნია და ამიტომაა საჭირო მისი ცხოვრებისეული კითხვა.