უფალი იესო ქრისტე - ციტატები, გამონათქვამები

ამოირჩიე, რა უკეთესია - მთელი სამყარო გაიხადო მტრად, თუ იესო შეურაცხყო?

უნდა გიყვარდეს მშობელი, მაგრამ მას მაცხოვარი უნდა ამჯობინო (კლ. 9, 59, 60)

დაე, გქონდეს სიყვარული ადამიანებისადმი ქრისტეს გულისთვის, იესოსადმი კი თავად მის გამო

ქრისტემ შეგვიყვარა ჩვენ, უღირსნი: მაშ, ჩვენც შევიყვაროთ იგი, რომელიც ყოველგვარი სიყვარულის ღირსია

რასაც ღარიბ-ღატაკი ღებულობს, მას თავად ქრისტე ღებულობს - ამ ღატაკის სახით (მთ. 25, 40).

გსურს ქრისტესთვის საამო ღვაწლი გასწიო? - ღატაკი შეიწყალე

ქრისტე ჯვრიდან გვეუბნება თითქოს ყველას და ყოველ ჩვენთაგანს: "აი, რა გავაკეთე შენი გულისათვის! შენ რა გააკეთე ჩემთვის?"

ო, ვერ გაწვდება ადამიანის გონება ღვთის სიყვარულის მთელ სიგრძე-სიგანესა და სიმაღლეს, რომელიც იესო ქრისტესგან გადმოდის ჩვენზე. მაგრამ მით უფრო საშინელია, იყო უმადური ამ სიყვარულის წინაშე

თუ ჩვენ ყველაფრით დავალებულნი ვართ უფლისგან ჩვენი შექმნის გამო, მაშ, რა ძალგვიძს მივაგოთ ღმერთს მის მიერ ჩვენი გამოსყიდვის საქმის აღსრულებისათვის და თანაც - ასე აღსრულებისათვის?

თუ სამყაროს შექმნა ღვთის სიყვარულის საქმეა, მაშინ ადამიანთა გამოსყიდვის საქმე ძე ღვთისას სიკვდილით, არის ღვთის სიყვარულის სასწაული.