წმ. იუსტინე (პოპოვიჩი) - ციტატები, გამონათქვამები

წმიდა საღმრთო გადმოცემა მთლიანად და სრულად – ღმერთკაც იესო ქრისტესგანაა, წმიდა მოციქულთაგან და წმიდა მამებისგანაა, – ანუ ქრისტეს ეკლესიისგანაა. და იგი მხოლოდ ეკლესიაში და ეკლესიის მიერ არის დაცული, და წმიდა მამებიც დამცველ–შემნახავნი არიან ამ ყველაზე ძვირფასი განძისა – წმიდა საღმრთო სამოციქულო გადმოცემისა.

ღვთაებრივი სავსებისაგან, რომელიც ღმერთკაც იესო ქრისტეში განხორციელდა, განუწყვეტლივ გადმოიღვრება აღურაცხელი და აუწყველი საღმრთო ძალნი, ყოვლად აუცილებელნი ადამიანური არსებისათვის, ხსნისათვის, განღმრთოების, ეკლესიის წიაღში შესვლის, ქრისტეს თანამოზიარედ და თანა–მყოფად გახდომისათვის, ანუ იმისათვის, რომ სულიწმიდის თანამოზიარე და ყოვლადწმიდა სამების ნაწილად შეიქნას. ყველა ეს ღვთაებრივი ძალა ერთი სიტყვით – მადლით იწოდება.

უპირველესი საიდუმლოა ნათლისღება, ხოლო უპირველესი სათნოება – რწმენა.

არსებითად, იერარქია თავის დასაბამს "საუკუნო მღვდელმთავრისაგან" იღებს – ღმერთკაც იესო ქრისტესაგან, ყოვლადწმიდა სამების მეორე ჰიპოსტასისაგან... იერარქია თავად იესო ქრისტესგანაა, და თვით ქრისტეს – იერარქიაშია და სწორედ ამიტომ იგი აიგივებს თავს იერარქიასთან, როცა ასე უქადაგებს წმ. მოციქულებს: "რომელმან თქუენი ისმინოს, ჩემი ისმინა; და რომელმან თქუენ შეურაცხ–გყვნეს, მე შეურაცხ–მყოფს; და რომელმან მე შეურაცხმყოს, შეურაცხჰყოფს მომავლინებელსა ჩემსა" (ლუკ. 10, 16).

ეკლესიის ცხოვრება, როგორც არსებობა ქრისტეს ღმერთკაცობრივი სხეულისა, დაიწყო სულიწმიდის გარდამოსვლით და საუკუნოდ გრძელდება მისი მუნმყოფობით ეკლესიაში, რადგან მხოლოდ სულიწმიდით და სულიწმიდის მიერ არის ეკლესია – სხეული ქრისტესი.