სულიერი მდელო - ციტატები, გამონათქვამები

უფრთხილდით, რათა საქმით არ შეურაცხყოთ ღმერთი, რომელსაც ტაძარში სიტყვით ადიდებდით

გიყვარდეს ღვთის სახლები, მაგრამ საკუთარ თავშიც ააშენე ღვთის ტაძარი

ხელით შექმნილი ტაძარი ვერ განაბრწყინვებს და აცხოვნებს იმას, ვინც, თავის მხრივ, არ მოღვაწეობს, რათა ცოცხალი ღმერთის ეკლესიას შეუერთდეს.

უბოროტობაში გულით ივარჯიშე, სხეულით კი - სიწმინდეში; ერთიც და მეორეც ღვთის ტაძრად გაქცევს.

უფალმა ექვსი დღე გამოგიყო შენი საქმეებისა და სამუშაოსათვის, თავისთვის კი მხოლოდ ერთი - მეშვიდე დაიტოვა (გამოსვ. 20, 9-10).

დღესასწაული სულიერი სიხარულის, მასში გულითადი მონაწილეობის, შინაგანი გრძნობის გარეშე იგივეა, რაც - სხეული სულის გარეშე.

დღესასწაული უქმე როდია, არამედ დღესასწაულია, ე.ი. საამო ზეიმი სულისა - ღვთის უდიდეს წყალობათა შესაცნობად.

საერო დღესასწაულებზე იხარჯება ის, რაც შრომის დღეებში იქნა მოგროვილი; საეკლესიო დღესასწაულებზე შეიძლება და საჭიროა, მოაგროვო სიბრძნის სულიერი საუნჯე - ჭვრეტითი და საქმიანი ისევე უხვად, როგორც - არასადღესასწაულო დღეებში.

დღესასწაული იმისთვის როდია, რომ მხოლოდ საქმე გადადო და უქმად იყო

თუ სადღესასწაულო დღეებში საყოფაცხოვრებო საქმეები უნდა შეწყვიტო, მაშინ, მითუმეტეს, უნდა განეშორო საქმეებს, რომლებიც სამუშაო დღეებშიც კი დაუშვებელია.