ჰკითხე სულიერ მამებს და როგორც ისინი გეტყვიან, ისე მოიქეცი; შენს მსჯელობას კი ნუ გაჰყვები, რათა უგუნურებამ უბედურება არ შეგამთხვიოს.

დადექი სალოცავად, გულის სიღრმიდან კაცთმოყვარე ღმერთს შეევედრე და შეღაღადე: „მეუფეო, შემიწყალე შენი სიკეთის გულისთვის, არ დაუშვა შენი ნებიდან ჩემი გადახრა და მოსალოდნელი განსაცდელის ჟამს ნუ დამღუპავ“. ეს სამჯერ აღასრულე, ისევე როგორც მაცხოვარმა მისი გაცემის ჟამს და თუ ამის შემდეგ შენში უეჭველ გულმოდგინებას შეიგრძნობ, რომ დარჩე და ღვთის მადლის დახმარებით მოსალოდნელი უბედურებები თვით სიკვდილამდე დაითმინო, მაშინ დარჩი. ხოლო, თუ გულში შიშს იგრძნობ, მაშინ წადი და ნუ იფიქრებ, რომ ასე რწმენას ღალატობ. რმერთი არ ითხოვს ჩვენგან იმას, რაც ჩვენს ძალებს აღემატება. რამეთუ, როდესაც შენში შიშს იგრძნობ და დარჩები, მაშინ შესაძლოა შემდგომში ვეღარ გაუძლო შენზე მოწეულ ჭირსა და წამებას, ჭეშმარიტების მოღალატე გახდე და საკუთარი თავი სამუდამო ტანჯვისთვის გაწირო.

მთელი შენი საზრუნავი კაცთმოყვარე ღმერთს მიანდე და თქვი: „მეუფეო! მე არ ჩამიგდია თავი განსაცდელში, იმ იმედით, თითქოსდა შევძლებდი მის დათმენას, არამედ უნებურად შევხვდი მას. ამიტომ, შენი სიკეთით და წმინდანების ლოცვით, არ დაუშვა, რომ წმინდა სარწმუნოებას ვუღალატო.