თუკი ისინი ფრიად საჭიროებენ დახმარებას, მაშინ ეს შეუსაბამო არ იქნება; რამეთუ ზოგჯერ ისეც ხდება, რომ საკუთრების გამღებმა სხვათა საჭიროების შესახებ არ იცის და ამიტომ არ მიუთითებს სხვებზე. ხოლო, თუ ის ხაზგასმით ამბობს, რომ იმ ერთი ადგილის გარდა, გამნაწილებელმა საკუთრება არსად არ გაანაწილოსო, მაშინ, დაე, ნუ დაარღვევს მის მცნებას, თუმცა ჯერ ჰკითხოს შემომწირველს და, როგორც ის ეტყვის, ისე მოიქცეს და გამნაწილებელი მშვიდად იქნება.

თუკი მანამდე შენ მათ სარწმუნო ადამიანებად თვლიდი, მაშინ ნუ დაგაეჭვებს ამ საქმის მათთვის მინდობა. რამეთუ ღვთისთვის ყველაფერი ცხადია: ის იცნობს ჩვენს გულებს და თითოეულს თავის საქმეებისაებრ მიუზღავს. ხოლო, თუკი ისინი რამეს დამალავენ, მაშინ მათ თავად მოუწევთ პასუხისგება.

თუ დანამდვილებით შეიტყობ, რომ მან რაღაც დამალა, მაშინ დაფიქრდი, გაუძლებს თუ არა იგი მხილებას და მხოლოდ ამის შემდეგ მშვიდად უთხარი, ღვთისნიერად შეაგონე და აიღე მისგან ის, რაც მიანდე. ხოლო თუ ის მხილებას ვერ მიიღებს, მაშინ ნუ დაუზიანებ სინდისს, რათა მან სირცხვილისაგან რაიმე უფრო უარესი არ ჩაიდნოს. თავი დაანებე, დაე, ფლობდეს იმას, რაც აიღო; რამეთუ, მან აიღო ის, რაც ღმერთს ეკუთვნოდა. ღმერთმა კი უკეთესად იცის, საჭიროებისთვის აიღო მან ის თუ არა; და ისიც იცის, როგორ განსაჯოს მისი საქციელი.

თუ შეიტყობ, რომ მან სხვა დროსაც გააკეთა მსგავსი რამ და ცდილობ საქმე გააუკუღმართოს, მაშინ შემდგომში მას არაფერი აღარ მიანდო. ხოლო თუ ის კეთილი ადამიანია და ეშმაკის ჩაგონებამ წარიტაცა, ან იმიტომ აიღო, რომ სჭირდებოდა, მაშინ კვლავაც ენდე მას, რადგან ის, რასაკვირველია, გამოსწორდება. ოღონდ არ დააბრკოლო.